अरे ब्वाल्ह रे!

रामराज कै यह तैयारी, अरे ब्वाल्ह रे
सांड़न का रातिब सरकारी, अरे ब्वाल्ह रे

जुम्मन मियाँ कहूँ जो जोर ते सांस लिहिन
एतनी बात प बीसन गारी, अरे ब्वाल्ह रे

एक्का दुक्का भले अबे मिलि जाएँ मगर
माननीय सारे ब्यभिचारी, अरे ब्वाल्ह रे

पूर पजावा खंजरु निकरा देखि परै
कदम कदम पर है बीमारी, अरे ब्वाल्ह रे

नीरव मोदी ट्वर्रा कीन्हे है म्वाछै
लेहे करोड़न केरि उधारी, अरे ब्वाल्ह रे

राजा जी के चढ़ा घोड़इयाँ घूमि रहा
भरी सभा जो खीन्चै सारी, अरे ब्वाल्ह रे

जी कुकुरन ते मुखिया रोजु सिकार करै
उनका वहु कइसे दुतकारी, अरे ब्वाल्ह रे

जहिके मंदिर मा मानवता बिलखि परी
कइसे हम आरती उतारी, अरे ब्वाल्ह रे

धारा तीन सौ सत्तरि फूँकि उड़ा दीन्हेव
मानि गएन तुम हौ अवतारी, अरे ब्वाल्ह रे

- प्रदीप शुक्ल