रोज़ बाउल में घमासान उर्फ़ साउथम्प्टन की लड़ाई
--------------------------------------------------------

साउथम्प्टन मा बजा नगाड़ा
भौकापुर तक परै सुनाय
जीति कै कपु लै आव जवानौ
चाय हियाँ पर रही सेराय

लल्लू मिसिर कहि रहे तुमते
भइया मानौ कहा हमार
तेज गेंद बाजन का लीन्हेव
काहे की परिहैं बौछार

जीतेव टास तो पकरेव बल्ला
भइया कोहली मानेव बात
हवा चली गेंदु फिरि घूमी
जइसे हुआँ बुढाई रात

चौथे नंबर पर राहुल हैं
कहि देव संभरि क खेलेव आज
हियाँ तो राहुल मेटि दिहिन सब
अब तुमरे हाथे मा लाज

लुंगी कै लुंगी ढीली भै
औ स्टेन का हाथु पिराय
लइ दइ कै बसि बचे रबाडा
उनका तुम लीन्हेव लुलुहाय

गब्बर तुमते हवै गुजारिस
रोहित है तुमते अरदास
दस ओवरन तक खड़े रहेव तुम
तुमका हम ब्वालब साबास

ईद मुबारक तुम पंचन का
सम्मी बिकेट गिरैहैं पाँच
दउरति - दउरति अफरीका के
निकरि न आवै देखेव काँच

बाँधि लंगोटा फालिन होइ जाव
लइ कै बजरंगबली क नाव
टीबी पर चिपके हैं लल्लू
म्वाछन पर दीन्हे हैं ताव

- प्रदीप कुमार शुक्ल

( सेराय - ठंडी हो रही, मेटि दिहिन - मिटटी में मिला दिया, पिराय - दर्द, लुलुहाय - चिल्ला कर भगा देना, काँच - रेक्टल प्रोलेप्स )

#वर्ड_कप_2019